சமநிலைக்கு வருவீர்களா ?

நீள் பாதையில்
வாழ் நாள் கழிய
நடந்து கொண்டே
இருக்கிறோம் !

நோக்கமில்லாமல்
நடக்கவில்லை !
தாக்கமில்லாமல்
துளிர்க்கவில்லை !

துணிந்துவிட்டோம் !

நீங்கள் கட்டிவைத்த
பிற்போக்கு கலாச்சார
கட்டமைப்புச் சாலை
பள்ளம் மேடாக கிடக்கிறது !

எங்கள் செருப்புக் கால்கள்
மேடுகளை தேய்க்கிறது !
நாங்கள் உமிழும் எச்சில்கள்
பள்ளத்தை நிரப்புகிறது !

சாலையில் எச்சில்
துப்பாதீர்கள் ! என்கிறீர்களே ?
சாலை ஒழுங்காக உள்ளதா !
அப்போதாவது
சமநிலைக்கு வருவீர்களா ?

இது உங்கள் மேலுள்ள
வன்மம் அல்ல
சமதர்மத்திற்கான அழைப்பு !
இது எங்களின் சுயநலம் அல்ல
சமூகத்தின் நலம் !

நாங்கள் காதல் செய்யும்
ஒவ்வொரு கணமும்
கற்கால கலாச்சாரம்
கலைவதைக் காண்கிறோம் !

நாங்கள் காமம் செய்யும்
ஒவ்வொரு நொடியும்
கற்பெனும் மூடமெல்லாம்
குலைவதைக் காண்கிறோம் !

நீங்கள் எங்கள் மீது
வீசும் ஏச்சுக்களுக்கு
எங்கள் இதழ் சாயத்தால்
வண்ணப் பூச்சு
செய்துவிடுவோம் !

உங்கள் வார்த்தைகள்
எங்கள் உடலைக் கூராயும்
போதெல்லாம் !
பிறக்கமுடியாமல்
தாயின் யோனியில்
உள்ளேயும் வெளியேயும்
அலைவதைப் போல
ஒரு திணறல் !
ஒரு தவிப்பு !
ஒரு வலி !

கற்பனைக்கு கூட
சிந்தித்து பார்த்துவிடாதீர்கள் !
தாங்கவியலாது !

எங்கள் வாழ்வு
அத்துணை இரணங்கள்
உள்ளடக்கியது !
ஆனால் துவண்டு
போகவில்லை !
துணிந்தே எழுந்து நடக்கிறோம் !

– அக்னி பிரதீப்

இதழ்கள்
புதிய பதிவுகள்
இணைந்திடுங்கள்
மின்னஞ்சல் பதிவு
By checking this box, you confirm that you have read and are agreeing to our terms of use regarding the storage of the data submitted through this form.

மேலும் படிக்க

Comments

மறுமொழி இடவும்

உங்கள் மின்னஞ்சல் வெளியிடப்பட மாட்டாது தேவையான புலங்கள் * குறிக்கப்பட்டன