அவள்

ஒரு‌ பெருஞ்சுடர் !‌

வேள்வியில் இருந்து வந்தவளல்ல

பல கேள்வியிலிருந்து வந்தவள் !

 

என்ன தான் அப்படி

கேட்டார்கள் ?

ஆம்பளையா நீ என்றார்கள் !

 

ஆமாம் ஆம்பள

இல்லை தான்.

உங்களுக்கு பதில் தெரிந்திருக்கிறதே !

 

ஆனால் பொம்பள என்று சொல்லி இருக்கலாம் !‌

 

உஸ்சுன்னு சொல்லி

உங்கள் ஆண்மையினை உசுப்பி

விட்டுக்கொள்வதில்

அப்படி என்ன தான்

ஆனந்தமோ ?

 

எனக்கு ஒரு சந்தேகமும் கூட !

ஆண்குறியில் வழியும்

விந்துகளில் தான்

ஆண்மை அகப்பட்டுள்ளதென

அறிவிப்போரே !

 

பிறகு என்ன கூந்தலுக்கு

மீசையை முறுக்கி

ஆம்பளடா !‌

என்ற தனக்குத்தானே

ஒரு ஆராதனை !‌

 

மீசையில் விந்து வடியுமோ

உங்களுக்கு !‌

என்ன விந்தையோ !

 

பெண்களே !

உங்களுக்கு கர்ப்பப்பை

இல்லையென்றால்

இந்த ஆதிக்க விந்துப் பைகளுக்கு

இங்கென்ன வேலை ?

 

நல்ல வேளை !‌

எனக்கு கர்ப்பப்பை இல்லை !

 

இந்த ஆதிக்க ஆண்மையின்

துளி விந்தினை சுமப்பதற்கு

 

அவை

இல்லாமலேயே

இருக்கலாம் !

 

என் புகைப்படத்திற்கு

கருத்துப் பெட்டியில்

வரிசையாக

“ஒன்பது” இருந்தது.

 

கனவான்களே !‌

அத்தனை “ஒன்பதுகளையும்”

கூட்டுத்தொகை செய்து

தொகையாக தாருங்களேன் !‌

என் ஏழ்மை களையும்

 

உழைக்க வேண்டியது தானே !‌

பிச்சை எதற்கு ?

பாலியல் தொழில் எதற்கு ?

 

உனக்கு தான் வாயும்

பற்களும் இருக்கிறதே !

நின்று கொண்டே

காலின் கட்டைவிரல்

நகம் கடி என்பது போல் !

 

இக்கேள்விக்கு

வாய் திறக்கும் பாழ் சமூகமே !‌

வாய்ப்பு தருகிறேனென

அதே வாய் சொல்லியிருக்குமானால்

என்றோ உழைத்து தழைத்திருக்குமே !

 

இன்னும் ஏராளம்

பரவாயில்லை!

 

அரசே !

திறனுள்ள திருநர்களுக்கு

சட்டம் செய்து

அறம் செய்

பாலீர்ப்பு ஒடுக்குதல் நீங்க அரண் செய் !

 

எனக்கு ஓர் ஆழ் மகிழ்வு !

இப்போது நான் !

நவநாகரீகப்‌பெண் !

 

 

– அக்னி‌ பிரதீப்

மேலும் படிக்க

Comments

மறுமொழி இடவும்

உங்கள் மின்னஞ்சல் வெளியிடப்பட மாட்டாது தேவையான புலங்கள் * குறிக்கப்பட்டன